प्रधानमन्त्रीलाई क्षयरोगको आशंका
Admin / 2014-08-12 02:43:34
काठमाडौं, २७ साउन । विभिन्न रोगले गाँजिएका प्रधानमन्त्री सुशील कोइरालालाई फेरि क्षयरोग (टिबी) को आशंका गरिएको छ ।
क्षयरोगको संक्रमण भएको आशंकामा चिकित्सकहरुले छातीको चेकजाँच गरेका छन् । परीक्षणका क्रममा प्रारम्भिक चरणको क्षयरोगको संकेत देखिएको मेडिकल डाक्टर समेत रहेका कांग्रेस नेता डा. शेखर कोइरालाले बताउनुभयो ।
अहिले प्रधानमन्त्री कोइराला खोकीबाट ग्रस्त हुनुहुन्छ । क्षयरोगकै आशंकामा गत बिहीबार ओम अस्पतालमा कोइरालाको छातीको सिटी स्क्यान गरिएको थियो । यद्यपि रिपोर्ट आउन बाँकी रहेको बताइएको छ । क्षयरोगको आशंका गरिएपनि आत्तिनुपर्ने अवस्था नरहेको उहाँले बताउनुभयो ।
कोइरालालाई क्षयरोग भए, नभएको बारेमा कोइरालाका निजी चिकित्सक समेत रहेका शिक्षण अस्पतालमा वरिष्ठ चिकित्सक करवीरनाथ योगीले जाँच गरिरहनुभएको स्रोतले बतायो । योगी क्षयरोगको विशेषज्ञ समेत मानिनुहुन्छ ।
फोक्सोको क्यान्सरको प्रारम्भिक उपचार गराएर अमेरिकाबाट केही साता अघि फर्कनुभएका प्रधानमन्त्री कोइरालालाई थेरापीपछि क्यान्सर भने घटेको देखिएको छ । तर, अहिले उच्च ज्वरो, रक्तचाप र खोकीबाट उहाँ पीडित हुनुहुन्छ । जसका कारण अधिकाँश समय उहाँ सरकारी निवास बालुवाटारमै आराम गरेर बसिरहनुहुन्छ ।
प्रकाशित मिति: 2014-08-12 02:43:34
प्रतिक्रिया: